चीनलाई चेतावनी, होर्मुजमा नाकाबन्दी
एजेन्सी । मध्यपूर्वमा इरान र अमेरिकाबीच बढ्दो तनावका बीच अमेरिकी राष्ट्रपति डोनाल्ड ट्रम्पले चीनलाई कडा चेतावनी दिएका छन् ।
उनले इरानलाई कुनै पनि प्रकारको सैन्य सहयोग गरिएको प्रमाण भेटिएमा चीनमाथि पचास प्रतिशतसम्म भन्सार शुल्क लगाइने बताएका छन् । ट्रम्पले यसअघि पनि चीनलाई इरानलाई हतियार वा सैन्य सामग्री पठाएमा गम्भीर परिणाम भोग्नुपर्ने चेतावनी दिएका थिए ।
अमेरिकाले होर्मुजको जलडमरू क्षेत्रमा कडाइ बढाउँदै पूर्ण नियन्त्रणको कदम अघि बढाएको छ । अमेरिकी केन्द्रीय कमाण्डका अनुसार सोमबारदेखि उक्त समुद्री मार्गमा नाकाबन्दी गर्दै निगरानी बढाइएको छ ।
इरानका तटीय बन्दरगाहबाट जहाजहरूको आवतजावत नियन्त्रण गर्ने उद्देश्यसहित सुरक्षा व्यवस्था कडा पारिएको बताइएको छ । राष्ट्रपति ट्रम्पले सामाजिक सञ्जालमार्फत सन्देश जारी गर्दै अमेरिकी नौसेनालाई होर्मुजको जलडमरूमध्य पार गर्ने सबै जहाजहरूको पहिचान गर्न, रोक्न र आवश्यक परे फर्काउन निर्देशन दिएका छन् ।